منتديات الأستاذ التعليمية التربوية المغربية : فريق واحد لتعليم رائد - عرض مشاركة واحدة

ليوم طاحت البقرة
كثروا لمواس
شي باغي لحم الراس
يبخروا فالكسكاس
شي باغي الهبرة
يديرها قضبان
يزيدها شحيمة
يكثر الدخان
شي باغي يدير القديد
يكسكس عليه نهار العيد
تشم ريحتو من سيدي بوزيد
شي باغي لحم الضلعة
يحيد بيه ذيك الخلعة
شي باغي لحم الملج
ياكل ويتفجج
شي باغي الكرعين
ياكلهم مع الوالدين
حتى يخرجوا ليه من الوذنين
شي مشهي المخ
ياكل ويبخ
حتى يبان ليه طير الرخ
ويدفع علينا البخ
شي باغي من الخنشوش
باش يبقى بالعز مرشوش
وريشو يبقى ديما منفوش
ويدفع علينا لفشوش
شي باغي يعمر لمصارن
ياكل منهم ويقارن
وحصانو مايبقى حارن
شي باغي الكبدة والقلب
ياكل هو وموالين الدرب
شي باغي لحم السلسول
ياكلو بكلام معسول
شي باغي الذيالة
تبعد عليه البلا
وتحيد ليه الدربالة
شي باغي الكرداس
باش مايبقى محتاس
يدير الذهب
ويحيد النحاس
ويصحصح لينا
مايبقى نعًاس
واحد باغي غير الجلد
يديرو هيدورة ويسجد
يحفظ كلام الله ويعبد
باش يلا جاه الليل يخمد
واحد باغي اللسان
ياكل طريفات بنان
شي باغي الضرع
قال ليك كيحيد الصلع
تمة بقى ياكل ويبلع
والناس تشوف وتسمع
شي بغا يدير لخليع
ياكل منو ويبيع
فين كنتوا
يا جماعة الشلاهبية
قبل ماتطيح البقرة؟
كنتوا فدار غفلون
بين قصاير الملحون
تبخوا فالسيكار
والغليون
والرقص على لقعادي
والكيسان
ذوك الكيسان يا سيادي
واللي فيه الحال يبان
الطايح كثر من النايض
والجيب ديما فايض
حتى طاحت البقرة
عاد مواسكم امضاوا
اللي سبقوكم آش اداوا؟
شحال احكاوا
شحال ادواوا
شحال من مواس مضاوا
شحال من بقر طيحوا
وشحال من بقر كلاوا
نتشوا نهشوا
نهبوا سلبوا
إيوا من بعد
من هاذ الدنيا آش اداوا؟
شبر من الأرض
وحفنة ديال التراب
ماتجيب عز
ماتعمر قراب
على قبورهم
ماتسمع غير نواح البوم
وزعيق الغراب