تغريدات زجلية

ضاعت لي وردة من المشموم

سمعوني يا حضرة
من قلبي نعاود هضرة
كان عندي مشموم
لميت فيه وريداتي من كل لون
مزينة بيه قلبي
نشوفو ونحمد ربي
واحد الصباح لقيت قلبي مغموم
سولتو مالك يا القلب مهموم
قال لي ضــــــــــــاعت لي وردة من المشموم
قلت ليه اوا صافي ياقلبي مالك على هد الحال
قال لي فقدت قطرات الندى وربيعي بدا يدبال
قلت ليه الورد كثيــــــــــر نشري ليك وحدة بميات مثقال
قال لي وردتي غــــــــــالية ماتباع ما تشرى بالمال
قلت ليه يا قلبي راه تساريت عليها كاع المدن
وفتشت عليها في بستان السُُّنّة والمتون
قال لي اوا خليني راه رضيت بالنصيب
كتاب عليا نعيش بين الناس غريب
يا قلبي يا قلبي لا تعذبني راه جهدي محدود
وقلبت عليها فكل مكان وصلت حتى الحدود
قال لي بحكمة اوا طلبي الله المعبود
قادر الجواد عليا وعليك يجود
قلت ليه صدقتي يا قلبي
مولاها ربي
قادر يفرح قلبي ويغفر ذنبي
والحمد ليك والشكر يا الكريم المتعال
بيتي قلبي في حال وصبحتيه في حال
ورجعات الوردة لمشمومي وزهات فيه النظرة
نشوفو يفرح قلبي ومن همومي نبرا
وهذي هي قصتي مع مشمومي يا حضرة