هانا جيت نعاود الطلّة
نجني من حقول حرفوك الغلة
نفرح نمرح ونزيد نتسلّى
العام زين يا زين الحلّة
لكطار اعطى عشرين وعشرة
الشتاء نزلات فالوقت وبالكثرة
نفعنا بيها الرحيم مول القدرة
غاتنا ورد أرضنا بالربيع خضرة
امطارنا مختالفة على ما هو معروف
ما جات بسحاب ولا بحساب متلوف
اشتانا ضباب منجتها من حروف
هطلات خيط من السما نازل مصروف
افهم المعنى يا صاحبي صاحب المعان
راني نقصد ناس القبيلة وأهل المكان
من قدرو حروفنا ورفعو ليها الشان
كرمو ضيفها خلاو طيفها يزيان
شكري ليكم ما هو بالقلة
يا ناس العز أصول وملّة
فاجيتو القليب وزولتو العلّة
من قليب العلام بعد المذلّة
وهاني طليت بعد الغبرة
ما نسيت الملح والعشرة
وزنان الكبدة والهبرة
والسمن الحايل وزيت المعصرة
وبولفاف على الزنان ملفوف
والعلاّم يصرط صريط الملهوف
بو العزوز افهى وبقى غير يشوف
يتبسم و يضحك مقدر الظروف
حيث الكلام تبرم على طرف لساني
الحديث تزمم وبلغاتو المعاني
وانت هرم تفهم المغزى يا غيواني
نبعث سلامي ليك ولباقي إخواني

فين الزغراتات فين الدقايقية ها العلام جا وجاب معاه مدجّة عقيقها حروف زاهية نوارة،يقدمها هدية لخيمة العز وماليها.
دار العز بلا علام القبيلة خاوية مهجورة .

بوركتما ،أبا العز وعلام القبيلة، على لحظات الامتاع هذه ورفع الله قدريكما وشأنيكما.

تقبلا مودتي واحترامي.